ده موضوع مش حكتبه كله دلوقتى وفى دماغى من قبل ما أبدأ فى البلوج ... كل ما أبدأ أفكر فيه أوصل لنفس النتيجة و مرضاش عنها و أحاول أعيد تفكير و أكذّب عقلى
بس كل حاجة بتوصل لنفس النتيجة ... أحنا كمصريين منستحقش الحرية
ازعل منى أو أكتب أى كلام براحتك ... بس برده مفيش فرق ... بنحب نبقى عبيد و نتذلل لأى كلب حتى لو من غير سبب
طبعا مش الكل لأن أصلا مفيش حاجة بيشترك فيها الكل فى أى زمان أو مكان ... بس الأغلبية المطلقة الكاسحة منا جبنا و خوافين و بيعشقوا الذل و النفاق و لحس رجلين اللى فوقيهم مهما كانت ريحتها معفنة
مينفعش تلوم الحرامى أنه سرق البيت و صحاب البيت شايفينه بيسرقه من غير ما يدافعوا عنه و الا تبقى عبيط و أهبل و تستاهل أنهم يشمتوا فيك بعد كدة لما يقولولك حد قال لك تعمل فيها أبو زيد الهلالى ...... مينفعش نلوم حسنى مبارك أنه بيسرقنا ويعذبنا و يسرطنا و يسجننا و يرجع فى الآخر يتمحلس لأسرائيل و أمريكا و فرنسا و روسيا و كل بلد محترمة و احنا راضيين بده و ساكتين
و مينفعش نلوم ممدوح اسماعيل عشان قتل ألف و ربعماية مصرى اذا كان أهل المقتولين نفسهم - قلنا برده مفيش حاجة أسمها الكل فيه حاجة أسمها الأغلبية - خدوا تعويضات و سكتوا
المصريين ميستاهلوش أنهم يبقوا أحرار لأنهم أصلا مش بيدوروا على حريتهم ...
المصريين ميستاهلوش عدالة أجتماعية لأن أصلا الفقرا راضيين بفقرهم و ساكتين و اللى يدافع عنهم عشان صعبانين عليه يبقى أهبل و عبيط ....
المصريين ميستاهلوش تعليم محترم لأنهم راضيين بالتعليم العقيم اللى بيتعلموه ولادهم و يطلعهم بهايم مش فاهمين حاجة فى أى حاجة
المصريين ميستاهلوش علاج محترم طول ما شاغلهم الوحيد ماتشات الكورة و فتاوى غسل الشراب و قص الحواجب
المصريين ميستحقوش غير اللى هما غرقانين فيه دلوقتى لأنهم ساكتين و راضيين و فيه منهم كمان اللى بيدافع عن كدة بكل استماتة ...
الأهبل اللى يدافع عن واحد مش بيدور على حقه
بس أنا مش شايف نفسى أهبل عشان بدافع عن المصريين ... عن البيت اللى اتسرق وصحابه واقفين بيتفرجوا على اللى سرقه ... لأنى أنا واحد من صحاب البيت ده
أنا مش عبيط عشان بعرض نفسى لأن كلب من كلاب الحكومة يقبض عليا فى يوم من الأيام أو يوقفنى فى مطار أو حتى يمنعنى من شغل
أنا قبل ما أكون بتاع مبادئ فأنا صاحب مصلحة مباشرة - زيك بالضبط - أن الوضع يتحسن ... التعليم و الصحة و حقوق البشر و الأكل و الشرب .... صاحب مصلحة مباشرة أن الفقرا اللى أنا مش منهم - و الحمد لله - مينضغطش عليهم لحد ما ينفجروا أو يتحولوا لمجرمين يتهجموا عليا أو على حد بحبه عشان يسرقوا منه تمن علاج مش قادرين يلاقوه أو لقمة مش قادرين يجيبوها
لو بقية صحاب البيت جبنا و أنا عملت زيهم يبقى استاهل اللى يجرى لى و لولادى بعد كدة ...
بس أنا - سامحونى يا كل اللى خايفين عليا - مش حسكت و مش حبطل أكتب و أعمل أى شئ فى امكانى - و فى أمكان كل واحد و أى واحد كتيييييير أوى يعمله - عشان أمنع الحرامى حسنى مبارك و عصابة الحزن الوثنى من أنهم يفضلوا يسرقوا فلوسنا و يسرطنوا أجسامنا و يبيعوا ثروات بلدنا لأجانب و يقتلوا أى أمل فى أى طفل أنه يكون أحسن فى يوم من الأيام
أنا - غصب عن أى حد - مصرى
و لو مفيش حاجة من اللى بعملها جابت نتيجة فعلى الأقل حيبقى ضميرى مستريح
و يوم ما حموت و اقابل ربنا حقول له أنى مخفتش من حد غيرك ... يمكن مأديتش كل حقوقك عليا ... بس كنت مؤمن بعدلك و أن محدش حيقدر يأذينى من غير أمرك
و حقول له أنى دافعت عن بلدى ضد المجرمين اللى مستوليين عليها باللى قدرتنى عليه
بس يارب الناس كانوا شاغلين نفسهم بالكورة و بفتاوى غسيل الشرابات و تقصير الهدوم و شتيمة أمريكا - اللى هما متأكدين أنها مش حتعاقبهم على كلامهم - عن أنهم يقولوا كلمة حق و يدفعوا تمن حريتهم
خليكوا فاكرين يا مصريين أن ربنا ميرضاش بالظلم ... و اللى يشوف بيته بيتسرق و يقعد ساكت من غير حتى ما يقول ولا كلمة يبقى ظالم و من الظلم أن واحد تانى غيره يجيبله حقه خصوصا لما يكون هو قادر عليه
كل واحد ابنه بيشيل شنطة مدرسة وزنها عشرة كيلو و ابنه التانى عاطل و بيشرب مية ملوثة وبيشترى أدوية مغشوشة و بيتعالج عند دكاترة متعلموش يعنى ايه علاج أصلا و بنته بتتعرض كل يوم لخطر المعاكسة و الأغتصاب ..... و بعد ده كله يفضل ساكت ميلومش غير نفسه
أفتكر كويس أنك لما بتدعى على ظالم أن أنت كمان ظالم نفسك و أهلك وولادك أنك ساكت و مش بتفتح بقك و مش بتقول كلمة حق
أحنا عمرنا ما حنستحق الحرية ولا الحياة غير لو سعينا لها و دفعنا تمنها غالى
كتبها أحمد بدوى في 06:41 مساءً ::
22 تعليق
في15,أيار,2007 - 02:54 صباحاً, abdallah khayat كتبها ...
عندك حق لاننا لسنا اكثر من خراف للحاكم
يذبحها يحرقها يغرقها كما يشاء
فنحن في كل الاحوال موتي
افلا يجب ان نكون رجالا ونجعلهم يدفعون غاليا مقابل موتنا ؟؟؟
ان نموت شهدا عوضا ان يكون موتنا فطيس ؟؟؟
سمها دعوه للاستشهاد
او سمها ماشئت
ولكن افعل شيئا بدلا من الكفاح علي صفحات الانترنت
عبدالله الخياط
في15,أيار,2007 - 09:56 صباحاً, حسن مدني كتبها ...
أنا قبل ما أكون بتاع مبادئ فأنا صاحب مصلحة مباشرة
مش حبطل أكتب و أعمل أى شئ فى امكانى
لو مفيش حاجة من اللى بعملها جابت نتيجة فعلى الأقل حيبقى ضميرى مستريح
لو ربع الشعب قال كده، الحال ح يتغير، ولو نص الشعب قال نفس الكلام حالنا ح يبقى كويس..
والحقيق يا أحمد إن الحكية مش بس أواجه الحكومة، واللصوص الكبار، أنا عايز الناس تقول للي بيعاكس أو يشتم أو يكسر الإشارة، أو يرفض يقف في الطابور، أو يتكاسل في عمله، أو الصنايعي اللي يديلك معاد ويجي بعده بساعة ويقول لك عادي ماحصلش حاجة..
كل دول بيخربوا الدنيا، لازم حد يقول لهم كفاية...
تحياتي..
في15,أيار,2007 - 04:22 مساءً, مستر M كتبها ...
فعلاً أن موافق أن المصريين لا يستحقون الحرية
ولكن المصريين 80 مليون
ومن المستحيل أن يكون الـ80 مليون كلهم لا يستحقون الحرية
هناك بالتأكيد على الأقل 1 مليون يستحقونها
وهؤلاء الـ1 مليون يستحقون أن أنبح صوتى ، وتنبح صوتك ، وينبح الـ80 مليون صوتهم من أجل أن يحصل هذا الـ1 مليون على حريته
في15,أيار,2007 - 07:17 مساءً, khalakhelo كتبها ...
تعرف, فيه مثل معروف بيقول سألو فرعون إيه فرعنك فقال لقيت الناس هبل فاستعبطهم
الموضوع هو هو, نفس الفرعون و نفس الناس
لكن برضه, أنا مش عايز أدافع عن السلبية لكن عن الناس نفسها, أولاً احنا الجهل بياكلنا, يعني حاجة زي تعويضات العبارة اتقال كلام كتير مين السبب و محدش كان عارف يصدق حاجة (معظم اللي بنتكلم عليهم مبيقروش جرايد, و جنيه في الشهر ده عُشر المرتب) و كل اللي كان هاممهم حياة ابنهم أو أبوهم, لكن خلاص, مش هترجع, فميبقاش موت و خراب ديار, أهه ممكن ياخدوا أي حاجة, و برضه يعرفوا منين هي الأي حاجة دي هي اللي منصوص عليها في اتفاقية أثينا ولا
في15,أيار,2007 - 07:21 مساءً, khalakhelo كتبها ...
على فكرة يا بدوي أنا ممكن أكون ظالم مكتوب, لما قلتله ينشر التعليق نشره كامل, بعدين لما ريلودت الصفحة بعدها على طول طلع مش كامل
غريبة, رغم إن زمان كنت بكتب أكتر من كده بكتير و يطلع كامل.
المهم, بقية تعليقي, (كتبته المرادي في ورق خارجي, منافستو يعني:)
و برضه يعرفوا منين هي الأي حاجة دي هي اللي منصوص عليها في اتفاقية أثينا ولا
في15,أيار,2007 - 07:23 مساءً, khalakhelo كتبها ...
ده قاصد أثينا بقى !!
المهم
و فوق ده طبعاً مش هيتكلموا, دول فقدوا واحد منهم مش لازم يبقوا أكتر
الفقرا طبعاً مش راضيين بالفقر نفسه, و على رأي علي بن أبو طالب (كرم الله وجهه) لو كان الفقر رجلاً لقتلته, لكن ديماً الأغنيا بيحتقروهم و يحاولوا يستعبدوهم و فوق ده كله يقنعوهم بطرق ملتوية إن الفقر ده أحسن للصحة و عشان ربنا يحبك, طبعاً كل ما الفقرا بقوا أكتر و فقرهم زاد الأغنية غناهم بيزيد
في15,أيار,2007 - 07:24 مساءً, khalakhelo كتبها ...
لأن القيمة الشرائية للي معاهم بتزيد(بافتراض إن اللي معاهم ثابت مش بيزيد), و حتى الأغنيا اللي بيشفقوا عليهم بيبصولهم من فوق و وشوشهم مكتوب عليها الشفقة, فالفقير طبعاً يا إما هيحقد و يحاول ينتقم بالسرقة و التملق و غيرهم, يإما يكتم غيظه و يفضل فقير بكرامته و فقره طبعاً يزيد مع زيادة المسافة بين الطبقتين, و في حالة زي مصر دلوقتي الطبقة المتوسطة ابتدت تزاحم الطبقة الأفقر فالأفقر بيزيد فقر أكتر
بالنسبة للتعليم, يعني لو مش راضيين ايه البديل ؟ ميودوش عيالهم المدارس, أو حتى يعملوا مدارس أهلية بديلة, و بعدين ؟ مفيش كليات ولا شغل هيقبلهم
أنا اللي عايز أقوله إن الناس مش راضية أبداً باللي هي فيه, بس محدش بيبقى عارف يعمل ايه, و لو طلع حد و قال إنه يعرف حل الناس ممكن تصدق بسرعة أي تهمة حكومية جاهزة بالعمالة أو غيرها, غير إن الناس عايزة تعيش (ممكن تفهمها أكتر لو كنت عائل لأسرة) و معندهمش إستعداد دايماً يدخلوا السجن يتبهدلوا فيه و يبهدلوا أهاليهم براه, و خاصة إن معظم الناس متقدرش تدفع كفالة ولا لهم واسطة ولا يفهمو في القانون
غير ده كله الحرية خصوصاً و قبل الباقيين حق متأصل لكل بني آدم, مش لازم يبرهن عليه بالحجج, أو يكتتب اللي مستعبده على حريته, محدش بيشتغل عشان يستحق حريته, هو يستحقها في كل الأحوال لكن المهم إنه يعرف إنه يستحقها, إن له في كل حاجة على الأرض و الأرض نفسها زي ما اللي مستعبده له بالظبط و إنه مش بيشتغل في عزبة أبو اللي مستعبده, الظلم مع الرضا يولد المزيد من الظلم و الذل, لكن الشعور بالظلم هو اللي يولد الإنفجار, و هو ده اللي بيدخل موضوع الجهل في كل حاجة, و هو ده دور الأقلية اللي تعتقد إنها عارفة طريقها, لو فيه
ممكن برضه تبص للموضوع على إن الناس بيقاوموا على طريقة ساتيا جراها, المقاومة السلبية, أنا مليش فيها قوي, بس متنفعش هنا أبداً, يعني انجلترا في الهند مثلاً كانت عايزة تبان إنها راعية الحضارة فلما بان العكس .. مش عارف بقى بصراحة, بس هي كانت ضعفت كتير في الحرب العالمية التانية, و منغيرها مظنش الساتياجراها كانت هتنفع عندهم (لانجليز) بربع نكلة, و أكيد مش هتنفع في مصر مع حكومتنا الباسلة اللي مش بتخاف من سفك دم الناس فما بالك لو احنا بنقولهم احنا مستعدين!
في15,أيار,2007 - 07:27 مساءً, khalakhelo كتبها ...
اشمعنى المرادي كاملة ؟!!!
على أي حال متأسف عالتطويييل
في16,أيار,2007 - 12:36 صباحاً, أحمد بدوى كتبها ...
"و لكن أفعل شيئا بدلا من الكفاح على صفحات الأنترنت"
استاذ عبدالله الخياط أتمنى أن كلامك ده ميكونش ليا أنا لأنه زعلنى بجد و لأنى مش حينفع أكتبلك قصة حياتى فى التلات سنين اللى فاتوا عشان أقنعك أنى عملت حاجة أكتر بحبة قليلين من الكفاح على صفحات الأنترنت .....
كون أن حضرتك متعرفش ايه اللى أنا و ناس تانيين عملناه - مش كتير أوى يعنى بس عملنا - فده لأنى ساذج مبعرفش و مبحبش و مش عاوز آخد مقابل لأى حاجة عملتها لصالح البلد و كمان مكانش هدفى أن حد يعرف اللى بعمله عشان مبقاش طالب شهرة بدل ما يكون مجهودى لوجه الله....
و أن كنت دلوقتى بقيت مقتنع أن لما الناس يعرفوا حاجة كويسة عملتها فده بيشجعهم أنهم يعملوا أحسن من اللى عملته ......
حقولك مثل بسيط قوى ..... مصطفى م. زميلى فى الكلية اللى تقريبا بقى منسق شغل الأشتراكيين الثوريين فى جامعة حلوان دلوقتى كان أول واحد يحاول يقنعه أنه ينضم لكفاية سنة 2005 كان أنا و كان بيقول عليا ساعتها أنى حوديه فى داهية
أنا فخور بده ....... هو دلوقتى بقى بيعمل شغل عمرى ما كنت حعمله فى توعية الناس - حتى لو فى اتجاه سياسى غير اتجاهى خالص - بس أنا بعتبر ده - من وجهة نظرى - دليل أنى كنت فى يوم من الأيام بعمل حاجة فى الواقع و بتجيب تأثير غير كلام النت اللى هو كفاح سفاح ملوش مستقبل
كلمة كبيرة أوى (لصالح البلد) دى بس مشيها المرة دى و أعتبر أنى فشار بقول أى كلام عشان ميحسش أن مجهوده فى تلات سنين - سقط منهم فى الكلية سنتين - كان هباء
في16,أيار,2007 - 12:48 صباحاً, أحمد بدوى كتبها ...
أستاذ حسن مدنى و الله كلامك فى الصميم ... لو كل واحد من خمسة حاول أنه يقف فى وش الغلط اللى بيعملوه أكيد حاجات كتير حتتغير
يمكن أنا مش عندى جرأة كفاية أنى أناقش كل سواق ميكروباص أركب معاه بيشتم و يزعق و يزعج الناس بالكلاكس و كل واحد بيرمى زبالة فى الشارع و كل واحد بيعمل حاجة غلط ... بس بحاول على قد ما اقدر و ساعات بنجح و ساعات لأ
و سبب أهتمامى أكتر بالناحية السياسية أن تأثير الأصلاح فيها أكبر بكتير من أى ناحية تانية فردية أو مجتمعية
و من ناحية تانية أكتر ناحية ممكن افيد فيها هى الكتابة لأنها - بالنسبة لى - أكتر طريقة بقدر أوصل بيها أفكارى بأقل حرق دم ممكن
و تسلملى تحياتك يا أستاذ حسن :)
في16,أيار,2007 - 01:05 صباحاً, أحمد بدوى كتبها ...
يخرب بيتك يا خلاخيلو ... ايه يابنى الكلام ده كله !!! ده أنا محتاج أسبوع عشان أرد على كلامك ده كله
بس حختصر ... أنت يمكن اللى عارف أنا ليه كتبت الكلام ده دلوقتى و ليه استخدمت الطريقة اللى مش بستخدمها غير لو دمى محروق على الآخر
أنت شفت معايا أزاى الناس بيقمعوا نفسهم بنفسهم و مش راضيين حتى أن حد غيرهم يقول اللى هما خايفين يقولوه
حاجة تانية ممكن نختلف عليها هنا ... الحرية حتى لو هى حق لكل بنى آدم فلازم البنى آدم ده يتعب عشان ياخد حقه و ألا ميطلبوش بقى
في16,أيار,2007 - 03:55 صباحاً, احمد رضا كتبها ... (غير موثّق)
الاخ احمد بدوي
كلام جميل و حلو و رنان و كله حماس بس في شوية حاجات كده استغربتها في كلامك
منين يا عزيزي جبت ان المصريين مش بيحبوا الحرية و ان المصريين مش عارف ايه و كام سطر كده كتبتهم ورا بعض كلها تبدأ بكلمة المصريين و تليها مباشرة اتهامات باطلة تصرح بها على انها واقع او عن دراسة و لم نستقرأ من كلامك انه رأي شخصي غير مبني لا على دراسة و لا كلام دكتور من دكاترة علم الاجتماع المحترمين
فطبعا و غصب عني من حقي اشكك في كل كلامك لانك قلت من ضمن الكلام انا مصري غصب عن اي حد و اعتقد ان ايمن نور و ابراهيم عيسى و بلال فضل و طلعت السادات و عبد الوهاب المسيري و الاف كفاية مصريين .. و كلهم طواقين للحرية و باحثين عنها .. اذن نحن لا نتحدث هنا عن استثناء يثبت القاعدة .
كل الامر و من جهه نظري الشخصية ان الاجيال السابقى لينا زي ابويا و ابوك و خالي و خالك و امهاتنا كلنا شافوا و اتربوا على الخوف و الذل نتيجة فترات قهر فظيعة الي ان ربونا احنا كمان عن كده .. لكن انا شايف ان جيلنا طفح بيه الكيل و ده اللي خلى واحد زي حضرتك النهاردة تعمل مدونة تثور فيها براحتك و اللي خلى شاب صغير في مقتبل العمر يتحمل مهانة و ضرب و تلطيش في مظاهرة عشان شوية حرية !!
لو راجعت نفسك هتلاقي ان المصري بطبعه يعشق الحرية و لكنه يهاب الحاكم الظالم الطاغية و ده اللي حاصل دلوقتي .
تقبل رأي بصدر رحب .. و تعليق اخير .. مدونتك لذيذة :)
في16,أيار,2007 - 05:18 صباحاً, أحمد بدوى كتبها ...
المصريين لم يقوموا خلال الكام ألف سنة اللى عاشوها فى مصر بأى ثورة ضد أى حاكم ظالم
حتى فى شدة لحظات الفقر و المجاعة كانوا بيموتوا فى بعض و يسيبوا الحاكم بدون مساس
الثورات اللى حصلت فى تاريخ مصر كلها ضد المحتلين الأجانب و دى بتهييج من الحكام القدام غالبا أو عشان بيعتبرو ا المحتلين كفرة
كل اللى حضرتك ذكرتهم ذرة فى بحر من الخنوع و الخضوع و ياريت تسمع الناس بيتريقوا عليهم ازاى فى كل حنة و بيعتبروهم مجانين
أنا قلت و بعيد أحنا مش حنستحق الحرية بالكلام اللى بيدافع عن الناس وخلاص .... لازم ناس كتير تبقى زى اللى أنت قلت عليهم عشان هما دول اللى مع الوقت يقدروا يغيروا من تفكير الناس و يشجعوهم
في17,أيار,2007 - 02:27 مساءً, مصطفى محي كتبها ...
مش عارف هل ينفع إن حد يقول إن المصريين كلهم أو معظمهم جبناء في الوقت اللي الإضرابات والاحتجاجات العمالية نازلة زي المطر، في الوقت اللي فيه حوالي 100 ألف عامل شاركوا في هذه الإضرابات والاحتجاجات، هتقولي إن دول إتحركوا عشان لقمة العيش مش عشان الحرية والديموقراطية، هقولك وهو ده الطبيعي، الناس الطبيعي إنها أول ما تبدأ تدور على حقوقها تدور على حقها الطبيعي فى الحياة في إنهم يكونوا عايشين كبني أدمين وبعدين هتبدأ المطالب تتطور، فهل تعرف مثلاً إن فى بعض المصانع زي مصنع غزل المحلة بيجمعوا توقيعات عشان يسحبوا الثقة من اللجنة النقابية بتاعتهم يعني الناس بعد ما إتحركت بدأوا يفكروا في حرية الاتحاد العمالي بتاعهم، وبدأوا يفكروا في إتحاد عمالي بديل أو موازي، يعني الناس بعد ما كانت بتفكر في الأكل والشرب بس (وده مش عيب طبعاً) بدأوا يفكروا في حقوقهم السياسية، بس بدأوا يفكروا في الحاجة اللي ممكن يأثروا فيها فعلاً ودلوقتي، بدأوا يفكروا في الحاجة اللي بتأثر عليهم بشكل مباشر وهي اللجان النقابية بتاعتهم، يعني الناس فكرها بيتطور أهه، هتقولي ماشي بس دول أقلية والباقي مش بيتحرك، هقولك تعالي نفكر بهدوء هو ليه فيه ناس بتتحرك وناس مبتتحركش؟، أكيد مش عشان فيه ناس شجعان وناس جبناء، وحتي لو هنقول كده، طيب هو ليه في ناس جبناء وناس شجعان، ومتقوليش طبيعة المصريين كده، أنا شايف إن اللي اتحركوا دلوقتي هما العمال، ليه؟ ، لأنهم قادرين على تنظيم نفسهم، عندهم أساس يقدروا من خلاله ينظموا حركتهم، العمال مجموعة كبيرة من الأفراد متواجدين بكثافة في مصانعهم وطبيعة شغلهم بتفرض عليهم التعاون لأن شغلهم بيكمل بعضه، بيفضلوا لفترات طويلة في نفس المكان مع بعض وفي نفس الوقت مصالحهم واحدة تقريباً، ده بيديهم الفرصة إنهم يتناقشوا في مشاكلهم في وقت الراحة أو في وقت صلاة الظهر أو أثناء الانصراف أو ساعة الصبحية، المهم إنهم بيتناقشوا (متتخيلش إن الأضرابات ده بتحصل فجأة كده) لغاية لما مجموعة منهم تبدأ تاخد قرار بإن الإضراب هو الحل ويبدأوا يحاولوا يقنعوا في زملائهم ولأن العمال هما أكثر فئة قادة على التأثير بإضراباها واعتصاماتها على عملية الإنتاج وبشكل مباشر وسريع بيكون عندهم شوية ثقة في إمكانية تغيير الأوضاع وده اللي بيخليهم أكثر قدرة على الإضراب، والتجربة بتعزز ثقتهم، مش فئات كتير في المجتمع المصري عندها المميزات ده، يعني الطلبة مثلاً صحيح موجودين لساعات طويلة مع بعض وعندهم حرية أكبر في التعامل مع الوقت لكنهم لو أضربوا مثلاً عن حضور المحاضرات واعتصموا داخل جامعاتهم وتظاهروا ده هيأدي لإيه، هيحرج الحكومة شوية هيمثل عنصر ضغط عليها لكنه مش هيخسرهم فلوس وياما الجامعة إنضربت بالقنابل المسيلة للدموع والاعتصامات إتفضت بالقوة، وده طبعاً بيخلى كتير من الطلبة بيفكروا إن احتجاجاتهم ملهاش لازمة، كذلك الناس في الشوارع لو حبوا يحتجوا هينظموا نفسهم إزاي لازم تكون هناك أدوات ينظموا نفسهم من خلالها، وإحنا الحمد لله لا عندنا أحزاب ولا نقابات ولا اتحادات، وده بيخلى الناس خايفة أكثر وبيفكروا إن الحل الوحيد هو إنك تطاطي، بس ده مش قدر ومش وضع نهائي، السنة ده مثلاً ناس كتير جت لنا وانضموا لينا، وقالوا لنا إنهم كانوا بيشوفونا من السنة اللي فاتت واحنا بتعمل المعارض بتاعتنا بس كانوا بيخافوا يقفوا على المعرض عشان كانوا خايفين للأمن المركزي يدخل جوا الجامعة ويلمنا كلنا (ده هما اللي كانوا متخيلين كده!) وبعدين لما وجدوا إننا مستمرين وموجودين ومحدش عملنا حاجة بدأوا يتكلموا معانا ويتناقشوا لما إقتنعوا بكلامنا أصبحوا معانا، الناس وعيها بيتغير ياأحمد، ووعي الناس مش ثابت، يعني البياعين السريحة اللي كل يوم والتاني تيجي البلدية تتطلع عينهم لو حصل إنهم وجدوا في مرة حد واقف جنبهم وبيدافع عن حقوقهم ده مش هيغير فيهم على الأقل شويه، يا أحمد الناس مش قاعدة مستنية شوية شباب ميعرفوهمش عشان أول مينزلوا في مظاهرة في وسط البلد هيقوموا معاهم، الناس مخنوقة بمسئولياتهم وإلتزامتهم وده بيخليهم جبناء أو مستسلمين زي ما إنت بتقول، وأحياناً كمان بيدافعوا عن القهر والظلم، اللي أنا عايز أقوله إن ده مش قدر وإن طالما فيه ناس بتتحرك يبقي لسه فيه أمل، ومش كفاية إنك تتحرك بس عشان ترضي ضميرك كده ولا هتعمل حاجة، لازم تبقي مقتنع بإن التغيير ممكن وهيحصل وإن دورك مش إنك تريح ضميرك وإنت قرفان من الناس وبتقول عليهم جبناء، دورك إنك تفكر وتدور على طريقة تقنع بيها الناس وتوصلهم، وده مش ممكن يحصل إلا بإنك تنزل للناس وتشتغل وسطهم، إللي هيبني دلوقتي هو اللي هيحصد بعد كده، وافتكر الإخوان كانوا عاملين إزاي في بداية السبعينات ودلوقتي أصبحوا إزاي، ومتقوليش إن ده عشان بيستخدموا الدين وبيتكلموا بإسمه، لأن حزب العمل برضه له أيدولوجية دينية ومع ذلك شوف حالته عامله إزاي.
في17,أيار,2007 - 02:39 مساءً, مصطفى محي كتبها ...
أولاً: أسف على التطويل في الرد الأولاني.
ثانياً: كتبت تعليقي الأول من غير ما أقرا باقي التعليقات ولما قريتها لي عدة ملاحظات.
1- أولاً اللي يخرب بيت التسييح بتاعك لازم منسق الاشتراكيين الثوريين يعني، عموماً ماشي يا أستاذ إنبسطت لما اعتبرت إن نجاحك في ضمي لحركة التغيير إنجاز حققته، وده أكبر كتيير من اللي أنا استحقه.
2- أنا سقطت سنه واحدة بس مش سنتين وماكانتش بسبب شغل السياسة ده كانت قبل ما أشتغل سياسة أصلاً.
في17,أيار,2007 - 04:35 مساءً, أحمد بدوى كتبها ...
الأعتراف بالحق فضيلة ... و كلامك يا مصطفى مش بس منطقى و مقنع .. الأهم كمان أنه عن تجربة على أرض الواقع عشان كدة لازم أحترمه و أصدقه .....
يعنى لو حد تانى عمره ما عمل أى نشاط أو جرب أنه ينزل للناس و يكلمهم قال الكلام ده مكانش حيبقى له مصداقية عندى و حعتبره كلام حماسى وخلاص ..... بس أنا عارف أنك بتتكلم من وسط المعركة ففاهم أنت بتقول ايه و خبرتك بقت أكبر منى بمراحل فى التوعية و بث الأفكار و الشغل المنظم
و أنا أظن أن أى حد يقرا كلامك لازم يفكر أنه يساعد بنفسه مش بالكمبيوتر
-------------------------------------------------------------------------------------------------
اللى جى ده بقى كلام خاص بيا ميهمش حد أنه يقراه :
طيب ... أنا ليه مش معاكم - فى الوقت الحالى - فى الشغل ؟؟ أعتبر كلامى ده دفاع عن اللى عملته مش أكتر ... أو بقية الرد على أستاذ عبدالله الخياط
1) أنا أصبت بأرهاق شديد فى الفترة القصيرة - سنتين - اللى نزلت فيهم الشارع و اشتغلت مع الناس مباشر ... بحيث أن أى مجهود بقيت أعمله بيتعبنى بطريقة فظيعة و هو ده اللى بيخلينى أقول دلوقتى أنى عجزت
ده له أسباب كتير منها أن مكانش شغلى منظم و متوزع على ناس كتير و كنت بصمم أعمله بضمير شوية كتير ...
مثلا زى موضوع استطلاعات الرأى - اللى كان من غير أى ترخيص بالمناسبة و كان قبل ما جرنان الدستور يطلع - و كنت بنزل ألف فى الشوارع أسأل الناس عن رأيها فى الحكومة و البلد و ياما أتعرضت لمواقف سخيفة و تعليقات رخمة و قابلت ناس كتير بتدافع عن حسنى مبارك باستموات وكنت بحاول أوضح لهم الصورة على قد ما أقدر..... و كان ليا زملا كتير بيشتغلوا بالطريقة المصرية الصميمة أنه ياخد الأستطلاعات و يملاها فى بيتهم و يسلمها لإيهاب على أنه عمل اللى عليه
السفر للمحافظات مع حزب الغد و مساعدة الناس هناك فى تنظيم المؤتمرات و والله كنت بعمل كل اللى أقدر عليه و ماكنتش بهتم أن ناس تانية بتعتبرنى عبيط عشان بشتغل من غير ما أبص أن حد ياخد باله أصلا ... مش حنسى كلمة شريف فاهد دايما لما بيقول لى يابنى أنت عبيط و مش فاهم حاجة و كل واحد باصص على مصلحة من شغله
انتخابات مجلس الشعب - واحدة تكميلية وواحدة عادية - و انتخابات الرئاسة تقريبا لفيت فيهم مدينة نصر كلها و كنا بنطلع العمارات نوزع الدعاية الأنتخابية و نكلم الناس فى التليفونات ...... لو قلت أن مش هو ده الشغل الصح فحقولك أن هو ده الشغل اللى عرفناه و قدرنا عليه وقتها
و شغل مقر مدينة نصر و بعديه مقر مصر الجديدة و توفيق الغواص و شريف فكرى و هانى الخياط و م.محمد زكى و م.مازن و م.باسل و ناس كتييييييير غيرهم يشهدوا أنى - وقتها - عملت اللى عليا و زيادة حبة
و برضه بعد حبس د.أيمن و مظاهرات استقلال القضاة و كل الكلام ده كنت مشارك فيه زى ناس كتير يعنى مجهودى مكانش للحزب بس
كان عندى حماس شديد بيخلينى محسش بالتعب - برغم أن صحتى أصلا مش سليمة - غير بعد ما الموضوع اللى أبقى شغال فيه يخلص لدرجة أن كان ممكن بعد ما أرجع من مظاهرة أو مؤتمر أفضل كذا يوم مش قادر على أى مجهود من أى نوع
يمكن أنا يا مصطفى مشتغلتش فى الجامعة خالص - لو قارنا شغلى بشغلكوا يعنى - بس كان شغلى برة الجامعة هو السبب المباشر فى سقوطى فى سنة تالتة الترم التانى و سبب غير مباشر لسقوطى فى سنة رابعة لأن كان وقتها عندى بوادر أحباط خلتنى مقدرش أذاكر أو أستوعب أى حاجة لدرجة أنى كنت بدخل الأمتحان معرفش المواد بتتكلم عن ايه !!!!!!
و أبقى أتفرج على البهدلة اللى بتبهدلها دلوقتى فى الكلية عشان السنتين دول
دى غلطتى أنا مش غلطتك ولا غلطة أيمن نور ولا غلطة حد تانى أنى مقدرتش أوفق بين الأتنين أو أنى أقسم وقتى و مجهودى و أنظمه
يمكن لو عرفت كمان أنى كان ممكن بسهولة لو مشتغلتش فى السياسة من الأول أنى أبقى دلوقت مهندس ليا شغلى و بيتى و فلوسى و يمكن صحتى كانت حتبقى أحسن كمان و مش حيبقى ليا ملف فى أمن الدولة ... و لو عرفت كمان أن - الحمد لله - مليش أى منصب فى الحزب و أصلا محدش فاكرنى هناك غير صحابى - ده غير أن الحزب أنهار أصلا
بقول لو عرفت كل ده فيمكن تعذرنى لما بقول لك أن تكتيكى دلوقت أتغير عن الأول ... أنا - بصراحة أكتر - شايف أنى عملت اللى عليا و أديت الخدمة العسكرية - و بقى اهتمامى دلوقت بأن أوازن بين الناحيتين ( مصلحتى الشخصية اللى أهملتها كتير و المصلحة العامة )
أنا مبطلتش كتابة - أضعف الإيمان - و متابع اللى بيحصل فى مصر من قريب - بس مش من جوة زى الأول - و بحاول أن لو فيه نشاط محتاج مجهودى أنى يبقى ليا دور فيه
و فى نفس الوقت بحاول أتخرج من الكلية - هى دى الأولوية القصوى ليا فى الوقت الحاضر - و بعد ما أتخرج ان شاء الله ححاول أن أرجع نشاطى فى مجالات جديدة زى حقوق الأنسان و التنوير و التوعية
بعدين متنساش أن للأسف أن مجالات الشغل السياسى محدودة بأفكار معينة -- اليسار الأشتراكى و اليمين الأخوانى
و أنا مع احترامى للأتنين مش منتمى لده ولا لده و صعب جدا أنى أشتغل فى منظومة أبقى مش مقتنع بأهدافها أو طريقة عملها ...... بس وعد أنى لما أتخرج أحاول - مع ناس تانيين كتير - أن نرجع شغل التيار التالت
في17,أيار,2007 - 04:49 مساءً, أحمد بدوى كتبها ...
بس حبيت أوضح للى يحب يعلق أنى مش بتكلم من فراغ و مش قاعد أشتم فى الناس من بيتنا و من غير ما أحاول أنى أكون ايجابى زى ناس كتير ما بتعمل
أظن - زى ما أستاذ حسن مدنى قال - لو كل واحد أشتغل شوية حاجات كتير حتتغير و الدليل كلام مصطفى محيى و التغيير اللى حاصل فى مصر دلوقت مبنى على شغل و تعب ناس كتير - بعتبر نفسى منهم - مش مبنى على شعارات أو دفاع عن سلبية الناس أو كلام جرايد و انترنت
أنا بقول أن المصريين بيحبوا الخضوع بطبعهم و اللى عاوز يثبت غير كدة لازم يكون واحد زى مصطفى محيى ... يكون شغال وسط الناس و دمه بيتحرق كل يوم من ردودهم و تعليقاتهم زى ما بشوف كل ما أقعد معاه
أنا بحب مصطفى قوى و بحس أنه كمل الطريق الى مقدرتش أكمل فيه و ياريت اللى يتكلم عن المصريين يبقى واحد زى مصطفى أو زيى اشتغل وسطهم عشان كلامه يبقى ليه مصداقية
في17,أيار,2007 - 09:16 مساءً, مصطفى محي كتبها ...
أنا عارف إنك تعبت كتير وإن اللي حصلكم كان كتير جداً، الحزب اللي دمروه والراجل اللي حبسوه وخربوا بيته ودمروا مستقبله السياسي، عارف إن كل ده أثر فيك كتير، ومتأكد إنك من الناس اللي أخلصوا واشتغلوا فعلاً ويمكن عشان كده إهتميت إني أرد على كلامك وأحاول أثبتلك العكس، لأن كلامك مش كلام واحد بيتفلسف وخلاص، ومحدش يقدر يلومك على إنك بتحاول دلوقتي تركز في مستقبلك، فعلاً الأولوية دلوقتي لحياتك الشخصية لأننا بشر ولو خسرنا كل حاجة هنموت، بس أرجو إنك ترجع لنا قريب، وأنا واثق إنك مش هتقدر تفضل بعيد لفترة طويلة، تحياتي وأشوفك في الامتحانات...
في05,حزيران,2007 - 02:05 صباحاً, شريف كتبها ... (غير موثّق)
معنديش تعليق على الكلام اللي قلته يا أحمد طبعا لأنك عارف أن اللي قلته هو بالضبط مشاعري الكاملة وده السبب اللي خلاني أبعد عن السياسة وأتبع مبدأ الشعب المصري كله (يا كش تولع ) كل اللي بأطلبه أني أنقل الموضوع للمدونة بتاعتي لأني فعلا بيعبر عن الكلام اللي جواية
في06,حزيران,2007 - 02:41 صباحاً, أحمد بدوى كتبها ...
صباحية مباركة يا عريس :):) ده أنا يبقى ليا الشرف يا شريف باشا أنك تنقل الموضوع للبلوج بتاعك :) بس على الله منجبش للناس اللى بيدخلو عندك اكتئاب أنت كمان
في20,تشرين الأول,2007 - 12:11 صباحاً, مجهول كتبها ...
انت فين يا بدوي ؟!
Amira From Hi5
طبعا بتقول ايه الست اللي داخلة بدماغها دي ! دي ولا حتي علقت علي الموضوع .. ههههه .. طيب يا سيدي كلامك كله تمام واحنا نستاهل بس برضو ما قلتش الحل ايه .. وازاي نفوووووق م اللي احنا فيه .. ماهو يا اما احنا اللي نفوووء يا اما هما اللي يفوووءوا او اننا الجوز نفوووء او نفوأ بعض
اقولك سلام انا طيب عشان عايزة انااااااااااام
خلينا نشوفك لو سمحت ومش تتأخر علينا بمقالاتك
في24,تشرين الأول,2007 - 07:54 مساءً, مجهول كتبها ...
يا أستاذة أميرة الأكونت بتاعى اتلغى على الهاى فايف بقاله كتيير و زعلت انى معرفتش أكلم الناس اللى هناك تانى ... بس انا مبسوط جدا انك عرفتى توصلى للبلوج تانى
ده عنوان بلوجى الجديييد ... http://bad-way.blogspot.com