من الآخر مش لاقى حاجة خالص اكتبها من زماااااااان و كل ما تيجى فكرة فى دماغى أنساها فقلت منعا للملل (أو زيادة فيه) أكتب أخبارى الشخصية بصفتى من المهمين فى مصر 
بس أولاعاوز أهنئ صديقى المخرج العظيم حننكش على باكورة انتاجه "تنهيدة" و أهنئ د. شريف فكرى صديقى اللدود على الجوازة السعيدة و من دلوقتى حاجز أول عيل يجيبه بأسمى .. آخده أربيه براحتى و أبقى أرجعهوله بعدين
ثانيا انا بشاور نفسى على الدخول فى حزب الجبهة ولا لا .. و لحد دلوقتى مش قادر اندمج هناك و مش حاسس بالجو اللى كان فى الغد زمان ... و برغم أن الناس هناك ولاد ناس قوى .. بس جو المؤامرات بدأ عندهم بدرى بدرى و الله أعلم حيخلص على ايه
ثالثا - من غير ترتيب - أخدت الأجازة يوم الخميس - الأمتحانات كالعادة طعمها مر - و رجعت أفتح الماسنجر تانى بعد ما كنت بطلت أفتحه من ييجى شهر ... اللى عاوز يكلمنى :
و لو عاوز يبعت لى ايميلات :
بس ياريت ميبعتش ايميلات على الهوتميل عشان مش بفتحه غير قليل قوى و ميضيفنيش على الياهو مسنجر عشان مش بشغله .... عقد بقى نعمل ايه !!
رابعا أحتمال - احتمال بسيط - أنى قريب أعلن فشل نظرية الأخ خالد كساب و كلمته اللى لحد دلوقتى منستهاش و ناخد الخطوة اللى اتأخرنا قوى فيها و نعرف بجد اذا كان الصداقة و التفاهم من على النت ممكن يتطور لحب حقيقى ولا لا
خامسا حبدأ أدوّر على شغل ... فلو حد هنا عنده وظيفة ليا يا ريت يقوللى و مستعدين لأى اختبارات أو انترفيوهات و مش حتشرط كتير ... يعنى لو وظيفة بحدود 2000 جنيه فى الشهر ممكن أتنازل و أقبلها 
لأ بجد ... لو حد عنده شغل ليا و لو مؤقت يقول لأن أنا محتاج الشغل قوييييى
سادسا ... مش عارف أقول ايه على هانى صاحبى اللى بجد من غيره كانت حياتى حتبقى ناقصة كتير و الله هانى بالذات غير أى حد تانى بعتبره هدية من السما و مش حعد أقول ليه ... كفاية هو عارف
سابعا ... فيه واحد بيهددنى بسبب الصور بتاعة حسحس اللى أنا حاططها على الهاى فايف ... فلو حصلى حاجة يا جماعة الفترة اللى جاية وصيتكم المدونة
و ادعولى من قلوبكم ربنا يحمينى عشان دعوتكم دى حتفرق معايا كتيييير
ثامنا ....... دى نكتة بعتهالى حاتم جاد صاحبى اللى لسة مقابلتوش غير على النت و بعتهالى و أنا بكتب الموضوع فقلت لازم أحطها هنا غلاسة
قرر الشيطان هجرة مصر؟
فبسرعه راحوله المصريين
وقالوله:أرجوك ماتمشيش هاتلاقي فين زينا كذابين ومنافقين وعاوزين يروحو النار؟
قالهم أنتوا ماتستهلوش
الواحد منكم يجيني شحات وحافي أخليه يسرق عشان ياكل ويلبس
ويغش عشان يتخرج يامتياز
ويزور في الانتخابات ويرشي عشان يبقي عضو مجلس شعب
وأول مايبقي (ريس)
ألاقييه معلق وراه
!!!! (هذا من فضل ربي)!!!!!!!!!!!!!!!!سلام و أشوفكم على خير ان شاء الله
أسلام ... هانى "مكنتش فاكر خالص أنه بيلبس نظارة زمان غير لما شفت الصورة دى" ... توفيق "ابو رجل مسلوخة" ... أنا
كتبها أحمد بدوى في 06:53 صباحاً ::
طيب ايه رأيك ان ده احسن ادراج ليك
رغم ان لك ادراجات جامدة قوي
لكن ناقص شوية حاجات مهمة
مثلا
مقلتش ايه كفاءاتك والسي في بتاعك عشان اللي عايز يلاقيلك شغلة يكون عارف هو هيشغل مين؟
نكتة جامدة خالص
ربنا يوفقك
ابقى اكتب لنا على اتجاه عملية التأسيس في الجبهة
يمكن يطلعوا احسن من غيرهم ولا مش باين؟
تقبل احترامي وتقديري
بالنسبة لموضوع المؤهلات ده لسة مش عارف بالضبط أكتب ايه !!!
المشكلة أن مش متخصص فى حاجة معينة ... يعنى المفروض فى الأساس مهندس كهربا بس مش بحب مجال الهندسة خالص ... بعرف انجليزى كويس جدا كتابة و قراية بس فى النطق و محادثة مش أوى ... بعرف فى الجرافيكس شوية ... ليا خبرة فى مواضيع الدعاية و الأنتخابات
معرفش حاجة زى معرفة التاريخ تبقى مفيدة فى الشغل ولا لا ؟؟
يعنى متهيألى الكلام ده كله ينفع يبقى واحد بتاع دعاية تقريبا بس مش مفيد لواحد بتاع هندسة
بالنسبة بقى لموضوع حزب الجبهة فده مش عاوز أتكلم فيه لكذا سبب :
1- أنا عندى ارتباط عاطفى بالغد و صعب أنسى تجربتى فيه وأبدأ من أول و جديد
2- أنا مقتنع أن المفروض كل واحد لازم يجرب بنفسه و يقول رأيه عن تجربة شخصية لأن أنا عارف أن أول ما حقول أى رأى سلبى فى الجبهة حتلاقى ناس من أخواتنا الكلامنجية ياخدوا الكلام ده حجة أنهم يفضلوا متفرجين كالعادة و ميتعبوش فى حاجة و ميحاولوش يجربوا بنفسهم و يكتفوا بأنهم جربوا فيا
3- المفروض أن حزب الجبهة تجربة ليبرالية جديدة و مينفعش أحكم عليها قبل ما تبدأ لأن مصر محتاجة انتعاشة لليبرالية و محتاجة زخم أكتر ( هو يعنى ايه زخم دى ؟؟) فى التيار الليبرالى و أنا عندى خبرة سلبية و خلفية مشوهة أو مش مضبوطة أوى مش عاوز أنقلها للى يقرا و معندوش الخلفية دى و أعمل دعاية سلبية للحزب الوليد الجديد
4- السبب الحقيقى بقى بعد كل الرغى ده أن ليا صحاب كتير ناشطين فى حزب الجبهة و لو قلت رأيى بصراحة أكيد حيزعلوا منى حتى لو مقالوش كدة فى وشى و والواحد ميضمنش لو مسكوا البلد بعد كدة يحبسونى بسبب اللى قلته :) .........
بس هو فيه واحد منهم ريحنى من الاحراج ده و قاللى قول اللى تقوله يعنى هو انت أنيس منصور :) ... طيب بس متبقاش تزعل بعد كدة يا عم
اخى الكريم احمد
تحياتى لك وانصحك بحاجة لا تعمل الا فى شيئ تحبه حتى تبدع فيه حتى لو مهنه يدوية
موضوع الجبهة ده يطول شرحه ولا يمكن الحكم عليه الا مع التجربة لانه حتى مع وجود ناس زى الفل المهم قدرتهم على العمل وتحريك المراكب الواقفة فى مصر
يا خبر النهارده بفلوس بكره يبقى بلاش
أولا شكرا على التهنئه ثانيا فين الشيشه ياد ثالثا لو عندك نسخة من التنهيده أبقى ابعتها لي ( رابعا أحتمال - احتمال بسيط - أنى قريب أعلن فشل نظرية الأخ خالد كساب و كلمته اللى لحد دلوقتى منستهاش و ناخد الخطوة اللى اتأخرنا قوى فيها و نعرف بجد اذا كان الصداقة و التفاهم من على النت ممكن يتطور لحب حقيقى ولا لا) هأعمل نفسي مش واخد بالي وأسيبك براحتك لحد ماتيجي وتنخ خامسا أبقى أتكلم وعايزيين نتقابل عشان وحشتوني
كل ده كوم بقه وإن انت تحط صورة توفيق في المدونة كوم تاني أنا ماعنتش داخل أم المدونه دي تاني .
http://e7naelsha3b.blogspot.com/
"هأعمل نفسي مش واخد بالي وأسيبك براحتك لحد ماتيجي وتنخ "
مشكلتى أن مش بدافع عن نفسى لو قاعدين مع بعض عشان متزعلش .. بس لما ببقى قاعد لوحدى و أقرا الكلام ده ممكن أرد رد سخيف أوى ... لأنه مستفز أوى ... و أقول كلام مضبوط أوى ... لأن تفكيرى بيبقى منظم و أنا لوحدى ..... يخليك تزعل منى بجد و تستغرب من اللى اقوله .... و حتلاقى كلامى عليك أنت أكتر ما هو دفاع عن نفسى و ده مش كلامى أنا بس على فكرة ده كلام نص صحابك بس محدش بيحب يزعلك
......... بس أنا برده مش عاوز حاجة تزعلنا من بعض فأحسن تبعد عن الموضوع ده خالص يا شريف و متتكلمش فيه تانى
مشكلتى أن مش بدافع عن نفسى لو قاعدين مع بعض عشان متزعلش .. بس لما ببقى قاعد لوحدى و أقرا الكلام ده ممكن أرد رد سخيف أوى ... لأنه مستفز أوى ... و أقول كلام مضبوط أوى ... لأن تفكيرى بيبقى منظم و أنا لوحدى ..... يخليك تزعل منى بجد و تستغرب من اللى اقوله .... و حتلاقى كلامى عليك أنت أكتر ما هو دفاع عن نفسى و ده مش كلامى أنا بس على فكرة ده كلام نص صحابك بس محدش بيحب يزعلك
......... بس أنا برده مش عاوز حاجة تزعلنا من بعض فأحسن تبعد عن الموضوع ده خالص يا شريف و متتكلمش فيه تانى
أيه ياعم الضرب في المليان ده أنا أتخضيت لما شفته أنا مش فاهم حاجة لو في كلام عايز يتقال قول والأيميل بتاعي عندك وأنت عارف أني مابزعلش بس انت شكلك شايل في قلبك وده تاني مرة يحصل الكلام ده وانا مابحبش حد يشيل عايز تكلمني أتكلم عايز تكتب في أيميل أكتب عايز نتقابل نتقابل بس قول الكلام اللي ماحدش عايز يقوله ده خلاص يا معلم