تقوم من النوم ... تغسل وشك بمية نسبة الكلور فيها أعلى من الطبيعى معرفش بكام ضعف ... تعد تفطر شاى و لبن ... اللبن فيه بودرة سيراميك و هرمونات نشطة - راجع الأهرام معرفش العدد رقم كام و لا يوم ايه بس أغلب اللى بقوله عرفته من أخبار منشورة فى الأهرام مش بألفه يعنى - الشاى معمول من نفس المية المليانة شوائب و بكتريا غير الكلور اللى قلنا عليه من شوية - طبعا لو سيادتك من منطقة قديمة فشبكات المية متوصلة بشبكات الصرف الصحى و أهه كله فوايد ...
الشاى نفسه فيه نسبة نشارة خشب - النسبة حسب السعر طبعا - تاكل لك طبق الفول المستورد من الصين و تغمس بعيش معمول من القمح المسرطن بتاع يوسف والى نائب رئيس الحزب الوطنى و تاكل معاها كام زتونة من اللى اتمنع تصديرهم من مصر عشان المزارعين المصريين بيستعجلوا على الزتون و بيدهنوه بورنيش جزم بدل ما يستنوا لحد ما يستوى
خلصت ؟ بالهنا و الشفا ... ألبس بقى ...... هدومك و أنزل من بيتكوا فى هواء القاهرة الجميل اللى زى الفل .... كان فيه مرة خناقة بين وزارة النقل ووزارة البيئة عشان التلوث اللى بتسببه أتوبيسات النقل العام ........ الصراحة وزارة البيئة كانت بكل عزيمة بتطلب أن شكمانات الأتوبيسات تبقى فوق الأتوبيس بدل ماهى قريبة من الأرض ........ و الهدف من كدة أن العادم ميتحطش فى وش الناس ..... محدش سأل طيب ماهو العادم حينزل لتحت تانى بالراحة و برضه يفضل فى الجو !!! و الناس برضه حتشمه غصب عنها !!!
على فكرة سعادتك مش مشكلتنا خالص فى موضوع العادم ده ... أنت كدة كدة شبعان من الدنيا ووجودك زى عدمه أصلا و مش حتفرق معانا لو اتهريت بأمراض الرئة و الربو و الحساسية ... كل ده عادى جدا .... بس المشكلة أن عيالك - اللى الريس مش عارف يأكلهم منين - لما بيشموا العادم بتاع الأتوبيسات و العربيات - اللى مليان رصاص نسبته أعلى من النسب العالمية برضه بكام ضعف - بيحصلهم موت لخلايا المخ و بتقل نسبة ذكاءهم و بتزيد نسبة النسيان و التوهان فيهم
هو أصلا الواد ابنك نازل من بيتهم شايل المدرسة على ضهره و لما يكبر حيبقى عنده تشوه فى العمود الفقرى بسبب الحمل الزيادة اللى شايله ... بس حنسيب حضرتك شوية محشور جوة الأتوبيس و نروح مع الواد المدرسة
بنتكلم عن التلوث أصلا فيبقى التراب اللى فى جو الحوش و الطباشير اللى فى جو الفصل و الغباء اللى فى جو التعليم كل ده ملوثات بتطلع لنا أجيال جديدة عظيمة
ابنك بيتعلم مايناقش حاجة و أن سمعان الكلام أهم حاجة فى الدنيا و أن الطاعة كنز لا يفنى وحضرتك طبعا مستكنيص أوى من كدة و مريح دماغك
ابنك بيتعلم أنه يكره الموسيقا و الرسم و القراية و الفهم و طبعا برضه دى حاجة تفتخر بيها قدام صحابك زى ماهو لما يكبر حيفتخر أوى أنه عمره ما قرا كتاب برة منهج الوزارة و يعتبر ده نصر عظيم
بيتلوث تفكيره و فطرته و يتعلم أن البلطجة و أن اللى معاه العصاية هو اللى يحكم ... متزعلش ... ايه ده أنت مش زعلان ؟؟؟ طب ماتفرحش أوى كدة أنه بيضرب العيال صحابه أو بينضرب منهم ... كل ده عشان يتعلم الحياة ماشية ازاى
برضه لما يكبر حبة و ييجى يسألك عن البنات و متعرفش ترد عليه ما أنت أصلا ملقيتش حد يرد عليك قبل كدة ... و تقول له مش دلوقت و بعد كدة يروح يتعلم من صحابه اللى تفكيرهم مشوه أصلا و تفكيره يتشوه كمان و كمان
الموبايل بيرن فى جيبك ؟؟؟ طيب آدى كمان حبة تلوث أشعاعى خبيهم جوة جسمك و متقولش عليهم لحد ...
هى يا دوب خلية سرطان صغننة قد كدة بدأت تشتغل جوة و كلها كام سنة والبنى آدم ده يحصل الكام ألف مريض بالسرطان فى مصر و اللى بيتعالجوا على ايدين دكاترة اتعلموا غلط أصلا و بأجهزة و أدوات متلوثة هى رخرة
عادى عادى فى المعادى و كذلك فى الزمالك و الأهلى كمان ... آل ايه و حتلاقى يطلعلك واحد يقولك ماهو التلوث فى كل حتة ........ طيب اشبع بيه يا حلو
كتبها أحمد بدوى في 10:15 صباحاً ::
بقية الموضوع لما أرجع
ياااااااااااااااااااااااااااااااااااع قرف