مبسوط ؟؟!!

بناء على طلب صديق قال لى قلل جرعة الكآبة شوية فى المدونة ... الناس مش ناقصة فأنا مش لاقى حاجة أكتبها !!!!

بتاجر بقصة الحب اللى عشتها و خلصت ؟؟ ممكن أكون فعلا كدة من غير ما أحس ولا أقصد ؟؟ يمكن فعلا أنا عاجبنى إن الناس تقول لى أنى عندى حق و يتعاطفوا معايا فبحكى حاجات مفروض محدش يعرفها ؟؟ .... مش عارف احتمال أنا مش شايف نفسى كويس !!

خلاص مش حكتب عن الاكتئاب اللى بعيشه ولا عن الحاجات اللى تجيب اكتئاب للناس - اللى هى كل حاجةة حواليهم - ولا عن قصة الحب التخيلى اللى حاولت انها تنجح لفترة قربت تكمل سنة من غير فايدة

بس برده أنا لسة مقتنع أن القصة مش منجحتش بسبب أنها بدأت عن طريق النت ... يمكن لأنها لو كانت بدأت بوسيلة تواصل تانية غير النت برده فمفيش أى ضمانة أنها كانت حتنجح ... بالعكس ... بس ما علينا

أكتب كلمتين ملهومش أى لازمة ولا معنى ولا تأثير عن السياسة و البلد و الكلام الفاضى ده كله ؟؟؟ طيب و بعدين ؟؟ حد حيسمع ؟؟ حاجة حتتغير ؟؟ هل رأيى له معنى أصلا؟؟ ولا كلام زى كلام القهاوى ؟؟

يمكن هو الفراغ اللى مخلينى مش عاوز أقول حاجة .... محتاج أشتغل !! بمعنى أن وقتى ميبقاش فاضى للتفكير فى الحاجات السخيفة دى كلها ..... محتاج أدخل القفص اللى بيدخل فيه الناس كلها و ينشغلوا عن التفكير فى العبث اللى احنا عايشينه

بس فعلا هو ده الحل ...... كدة كدة الحياة عبث فارغ مكرر سخيف من غير معنى و المشاعر كلها أوهام و كهربا فى المخ

كل واحد بس مطلوب منه يلاقى حاجة يصدق أنها حقيقية يملى بيها وقته لحد ما يخلص دوره اللى اتمثل مليون مرة قبله و حيتمثل مليون مرة بعده ...

النجاح و السيطرة و الحب و التعصب كلها طرق بيخترعها البشر عشان يصدقوا أنهم ليهم معنى و كل واحد بيحاول يعمل شئ أو يدوب فى كيان أكبر منه عشان يستمر وجوده

كلام فارغ ..... كلامى أنا كلام فارغ ...... و كل شئ ممكن اللعب بيه عشان يحس الإنسان أنه حى و حقيقى و له أثر ... كل حاجة قابلة للتلاعب و التفاوض

كلامى مش بيبنى جديد ولا هو أصلا كلام جديد ..... كل الفاشلين أو المكتئبين بيقولوا كدة عشان يهربوا من الدنيا .....

خلاص خلاص بحاول أهه أسمع الكلام و أدخل الدوامة و أبطل سفسطة فارغة ..... يمكن الكلام ده هذيان واحد ماشى ناحية السجن برجليه - سجن الدنيا - و بيسجل بالطباشير على الحيطة أى كلام عشان يبقى يفتكره بعد ما يتحول لمواطن صالح مطيع مربوط فى الساقية و مصدق أنه حقيقى و أنه اللى بيعمله له معنى ....... و المعنى فى بطن واحد جعان