مدونتى الجديدة - سنة من التدوين

بدوى الأول عشر الجديدة

يا جماعة بعد التفكير و التدبير ثم التخريط و التقشير (ما هى كوسة بقى)

قررنا نحن سيدنا الوالى بدوى الأول عشر نقل مقر القصر الجمهورى الملكى الرئاسى الديمقراطى الاشنراكى الليبرالى الأهلاوى الزملكاوى الى مدونة جديدة على بلوج سبوت

و أول حاجة حعملها بعد القرار ده انى أتوجه بالشكر لأسرة مكتوب اللى كنت ضيف تقيل على قلبهم لمدة سنة بحالها كتبت فيها مواضيع كتيـــــر(111) و رديت على تعليقات كتير(632) أغلبها جميل و شوية منها رذل و عرفت ناس كتير كويسة و ناس قليلين وحشة

أنا الصراحة مش عارف أرتب الكلام لإنى ارتبطت عاطفيا بالمدونة هنا بشكلها و لونها الأصفر الرخم و شغلى فيها على مدى السنة دى عشان شكلها يبقى مقبول و منظم حبة و احساسى لتانى مرة فى حياتى انى بعمل حاجة و بتنجح (أول مرة لما فرحت بدخول كلية هندسة) و حتوحشنى أوى الكتابة هنا و انتظار التعليقات - اللى نادرا ما بتيجى - بقلق و احساس بالمسئولية 

عدد الزيارات هنا كان بالنسبة لى هايل جدا (41898)زائر - طبعا لما تقرا انت الكلام ده حيكونوا زادوا فبلاش ذكاوة - يعنى بالميت أوى لو قلنا أن فيه ناس دخلت مائة مرة و ناس دخلت مرة و قلبها ما طاوعهاش أنها تتعذب تانى يبقى تقريبا ممكن أكون وصلت لأكتر من ألف قارئ ...... تخيل ألف واحد بيقرولك يا واد يا بوشكاش دانتا عديت يا ولا

كل واحد دخل هنا و قرا و علق و عجبه اللى بكتبه سواء فى الأسلوب - اللى كل الناس بيقولوا أنه حلو - أو المضمون اللى تقريبا ملوش طعم أوى فأنا مستنيه فى بيتى الجديد اللى بجهزه بقالى كام يوم ولسة بجهز فيه و ناوى أنقل أغلب مواضيعى هناك - و دى حاجة متعبة قوى و الله - بس مش هاين عليا أسيب ولا موضوع ولا تعليق غير لما آخده معايا هناك

طبعا الموضوعات اللى كانت بتناقش حادثة انتهت دلوقتى مش حنقلها و حسيبها هنا لو حد بيحب التاريخ ولا حاجة ...... مين عارف مش يمكن بعد خمسين سنة يعملوا أرشيف لكل الكلام اللى اتكتب فى كل المدونات ؟؟

المشكلة هناك أن الشكل الجذاب أهم من المواضيع نفسها ... مش كدة بالضبط ... بس الفكرة أنى هناك حبذل مجهود أكتر بكتير فى الشكل و الألوان و الصور و ممكن ده يأثر على مستوى الكتابة - من غير ما تقول عارف أنه واقع خلقة و مش محتاج حاجة تاثر عليه بس حظك كدة بقى أعمل لك ايه يعنى ؟

المهم ... كفاية رغى ... أنا لسة - غالبا - مش حموت دلوقتى و اللى عاوز يتابع مسيرة الإنجازات البدوية يجيلى فى البلوج الجديد و يقول لى رأيه

بدوى الأول عشر كلاكيت تانى مرة